US leh China-in TikTok ah inremna siam ta

US president Donald Trump chuan US-a China siam social media platform lar, TikTok hman chhunzawm a nih theih dan turah China nen inremna an siam ta tih a sawi.

President Trump hian UK pana a zin chhuah hmain inremna an siam theih thu hi a sawi a, Zirtawpni hian China president Xi Jinping biain, engkim an tifel tawh dawn tih a tarlang. Inremna an siam dan kimchang erawh an la puang lo.

US treasury secretary Scott Bessent pawhin inremna ruangam hi an siam vek tawh tih sawiin, ram pahnihte hruaitute inbiak hunah tihfel a ni tawh dawn a ni, a ti. Inremna siamna kawngah President Trump a ṭangkaiin, a kaihhruaina tel loin inremna hi an siam theih a rin loh thute a sawi bawk.

Kumin January 18, Foreign Adversary Controlled Applications Act hman ṭan a nih hma niin US-ah TikTok hi tihtawp a ni a, mahse, President Trump-a'n a term hnihna atana office a luah ni, January 20 khan TikTok khapna ni 75 chhung tihkhawtlaina tur thupek a tichhuak a ni. June thlaah tihtawp hun hi pawhsei leh a ni a, hemi hnuah September 17 thleng atan pawhsei a ni chhunzawm leh bawk. Hemi chhung hian China nen inremna siam dan kawng zawngin inbiakna an nei chhunzawm a ni.