President Trump-a'n UK-ah state visit nei

US president Donald Trump leh first lady Melania Trump chu Britain lal, King Charles III in a sawm angin Thawhlehni zan khan London an thleng a, UK-a state visit a neih vawi hnihna a ni.

Standsted Airport-ah President Trump hi UK-a US ambassador Warren Stephens leh King Charles-a Lord-in-Waiting, Viscount Henry Hood te an lo hmuak a ni. Nimin zing khan England chhim chhak lam, Bershire-ah Prince leh Princess of Wales ten President Trump-te nupa hi lo dawngsawngin, hemi hnu hian King Charles leh Queen Camilla te an hmu a, Trump lo lawmna atan hian Windsor Castle-a East Lawn leh Tower of London aṭangin Royal Salute pek a ni. St George's Hall-ah zanriah buatsaihin, he hunah hian King Charles leh President Trump te chuan thu an sawi. Trump hian kum 2019, Queen Elizabeth II lal lai khan UK state visit hi a lo nei tawh ni.

Trump hi vawiinah Britain prime minister Keir Starmer nen an inhmu dawn a, trade deal chungchang pawh an sawi tel rin a ni. US hian chhiah lakna rate thar a siamah UK steel chawk luhah 25% la turin a ti a, hei pawh hi tihhniam turin PM Starmer hian a ngen rin a ni. Ram pahnih hruaitute hian thawh dunna tur inremna pawh an ziak nghal rin a ni bawk.

President Trump-a'n UK a pan hma hian technology lama an thawh dunna tur puan a ni a, US tech firm-te chuan UK-ah £ tld 31 an invest tur thu an puang a, an zingah hian Microsoft pawh an tel. Google, Alphabet chuan UK-a artificial intelligence research tihna atan £ tld 5 an invest dawn tih an puang bawk.