UN team dinin Gaza-a insuatna kalpuiah Israel puh

Gaza Strip-a indona thleng chungchang zirchiangtu, United Nations Human Rights Council din independent expert team chuan Israel chet dan chu mi nawlpui thahna rapthlak tak, insuatna kalpuinaah puhin Israel dang turin ram hrang hrangte a ngen. Hei bakah a mawhphurtute hremna pe tura hma la turin a ngen bawk.

Member pathum awmna team, Commission of Inquiry on the Occupied Palestinian Territory and Israel hi kum li liam taa din kha niin October 7, 2023-a Hamas-ten Israel an beih hnuah Israel-in Gaza a beih let chungchangah mihring dikna chanvo palzut a nih dante report a lo tichhuak fo tawh a ni. Mahse, commission leh a dintu, Human Rights Council a takin hma erawh an la zui thei lo a, commission report hi International Criminal Court leh UN-a International Court of Justice-ah prosecutor-ten ṭan chhanah an hmang thei dawn thung a ni. Independent team anga din a nih avangin UN aiawh erawh an ni lo.

Israel chuan Gaza chungchang zirchianna a neih hian commission hi ṭan lam nei sa a ni tiin a thawhpui duh lo a, kumin kumtir lam khan Israel ṭhianṭha, US pawh council aṭang hian a inhnukdawk tawh bawk a ni.

Hetih lai hian Israel chuan Gaza City a thununna hnuaia dah tumin Thawhṭanni zan khan beihpui a thlak. Israel Defence minsiter Israel Katz chuan Israel sipaite chuan firfiakte hmunhma chu na takin a bei tih sawiin, Hamas-te hneh a an mi hrente chhuah an nih theihna turin sipaite chuan huaisen takin an bei zel a ni, a ti. An thil tum an hlenchhuah hma chuan an hawikir dawn lo tih a sawi bawk.

Israel tlawhtu, US secretary of state Marco Rubio leh Israel prime minister Benjamin Netanyahu-te pawhin Thawhṭannia an inkawmnaah Gaza buaina chingfel tur chuan Hamas-te tukdawl a, an mi hrente chhuah vek a ṭul hmasa tih an sawi.