Qatar PM-in Israel hrem turin a phut

Qatar prime minister Sheikh Mohammed bin Abdulrahman bin Jassim Al-Thani chuan Israel chet dan chu hnawl tur leh hrem turin khawvel ram dangte a phut tih a sawi.

Israel-in Qatar khawpui, Doha-a Hamas member a beih chungchangah nimin khan Arabi-Islamic emergency summit koh a ni. Arab leh Islamic hruaitu hrang hrangte Israel chet dan an dem zia lungrual taka lantir leh, Gaza Strip-a inbeihna titawp tura na zawka Israel nawr a nih theih dan turte an ngaihtuah a ni.

Qatar PM chuan, "Ram hrang hrangten Israel khawsak dan chu an dem a, an pawikhawihna zawng zawng avanga an hrem a hun tawh a ni," tiin, Gaza-a Israel chetdan chu a hlawhtling dawn chuang lo tih a sawi bawk. Ram dangten an ngawihsan ṭhin avangin Israel chuan pawikhawihna thlen chhunzawm zel turin a tiphur a ni, a ti.

Nimina summit neihah hian Iran president Masoud Pezeshkian, Iraq prime minister Mohammed Shia al-Sudani leh Turkey president Recep Tayyip Erdogan te pawh an tel. Pathiani khan Palestinian Mahmud Abbas pawhin Doha hi a lo thleng tawh bawk. Meeting-ah hian Israel-in Qatar ram a beih demna draft resolution siam tur pawh an ngaihtuah dawn tih Qatar foreign ministry thupuangtu chuan a sawi.

Turkey foreign minister Hakan Fidan chuan Israel khawsak dan chu Palestine-Israel buaina chungchang pawh a ni tawh lo a, a ram zauh zel a tum chu buaina ber a ni tawh a ni, a ti. Hei vang hian Arab leh Islam ramte chu an ṭanrual a, Israel harsatna siam chinfel dan tur hi an ngaihtuah vat a ngai tih a tarlang.