US, SKorea leh Japan-in joint military exercise nei

United States, South Korea leh Japan chuan nimin aṭang khan South Korea-a Jeju Island-ah sipai nunchan zir hona, joint air and naval exercise an nei. Exercise hi 'Freedom Edge' tiin an vuah a, tunkar Zirtawpni thleng an nei ang.

South Korea Defence Ministry chuan North Korea-in nuclear leh missile hmanga a inthuam chak zelna do letna turin he exercise hi neih a ṭul tih a sawi a, ram pathum sipaite nunchan zir hona hi tuipui, boruak leh cyberspace lama an thawh hona tihchakna turin a pawimawh a ni, a ti.

US Indo-Pacific Command chuan exercise-ah hian ballistic-missile leh air-defence system pawh enchhin a ni dawn tih sawiin, ram pathumten defence lama thawh hona an neih ṭhatna lantirna a ni tih a sawi bawk.

North Korea chuan joint military exercise neih hi a sawisel nghal a, NKoram hotu, Kim Jong-un farnu, Kim Yo Jong chuan an thiltih hian ram pathumte lakah nghawng ṭha lo zawk a thlen ngei ang, a ti. US leh SKorea-in Iron Mace tabletop exercise an lo neih tawh pawh a sawisel bawk a ni.

Tun hnaia US Immigration and Customs Enforcement (ICE) in Georgia state-a Hyundai-LG battery plant an dapnaah, South Korea mi hnathawka awm 300 chuang man an nih avangin nimina US nena joint military exercise neih pawh an ram chhungah duh lohna lantir an awm a ni. SKorea mi mante hi an visa in a huam chin bakah awm zui leh, US-a hnathawh phalna pek tel lohte niin an sawi. Mi 475 manin, an zinga 300 chuang hi SKorea mi an ni. SKorea mi an mante hi kar khat hren an nih hnuah Zirtawpni khan an ramah hruai haw an ni tawh. He thil thleng vang hian Hyundai chuan an plant hawn hun tur hi thla hnih velin a khawtlai dawn tih a sawi tawh bawk.