London-a kawngzawhnaa buaina chhuakah police officer 26 hliam

Far-right activist, Tommy Robinson huaihawta kar liam ta Inrinnia England khawpui, London-ah an rama dan loa pem lutte duh lohna lantirnaa innawr buaina thlengah mi pakua man an ni a, police officer 26 an hliam bawk.

'Unite the Kingdom' tih hminga rally huaihawtah hian mi nuai khat chuang an tel. Pungkhawm zinga ṭhenkhat chuan venhim hna thawktu, police-te nen innawr buaiin bottle-ten an vawm zui bawk a ni. Police-te chuan buaina chhuaka inhnamhnawiha mi pakua man anih bakah, inhnamhnawih dang eng emaw zat hriat chhuah belh an ni tawh bawk tih an sawi.

Robinson hi a hming tak chu Stephen Yaxley-Lennon a ni a, anti-Islam English Defence League dinin, Britain-a far-right activist lar leh huhang ngah ber pawl a ni. Robinson chuan pem lutte chuan British mite aiin court-ah dikna chanvo an ngah tawh zawk niin a sawi. Ethiopia mi pem lut, London khaw daia hmeichhe tleirawl, kum 14 mi khawihtua puha thiam loh chantir a nih hnuah London-ah hian an rama pem lutte duh lohna lantir a lo ni tawh bawk a ni. Nawrh huaihawtna ṭhenkhatah chuan tharum thawhna te pawh a thleng bawk.

Inrinnia 'Unite the Kingdom' kawngzawhnaa tel hian England flag leh United Kingdom flag te an chang a, an ram chu an kuta awm let tura an duh thute an aupui a ni. Hei bakah lawng hmanga an rama lutte dang tur leh, dan loa lutte chu thawn haw tura an phut thute an aupui bawk. US conservative activist, kar liam taa kah hlum Charlie Kirk sunna hun an hmang bawk a, bagpiper-in 'Khawngaihna Mak Mawi leh Duhawm' tih hla an tum zui bawk a ni.

Inrinni vek hian Stand Up To Racism group chuan 'March Against Fascism' kawngzawh an huaihawt ve bawk a, left-wing lamin an thlawp thung. 'Unite the Kingdom' kawngzawh hi boruak muanawm tak hnuaia neih a nih laiin, chawhnu lamah an zinga ṭhenkhat chu 'March Against Fascism' kawngzawhte chu tibuaiin, police-ten daidanna an siamte tihchhiat an tum a, police-te nena innawr buai zui ta a ni.