Court-in kum 1 jail tang turin PM hlui Thaksin Shinawatra a ti

Thailand Supreme Court chuan nimin khan an ram prime minister hlui, Thaksin Shinwatra chu jail-ah kum khat tang turin thupek a tichhuak. Damdawi-ina a awm hun chhung a tan hun anga chhiar tel theih a ni lo, a ti. Bangkok Remand Prison-ah dah nghal a ni.

Thaksin Shinwatra hi prime minister a nihna aṭanga paihthlak a nih hnuah ram pawn lamah tlanchhiain kum 15 a awm a, kum 2023 khan Thailand-ah a kir leh a ni. Paihthlak a nih hnuah eiruk leh a thuneihna dik lo taka hmanga puhna thubuai siamsakah kum riat tang tura hrem a ni a, mahse, hei hi an ram lalin tihnep sakin kum khat tang tura tih a ni. Kum 2023 August thlaa an rama a kir khan man nghal a ni a; mahse, jail-a darkar reilo te chauh a awm hnuah lung lamah harsatna a nei nia sawiin damdawi-inah dah a ni a, hei hian sawisel pawh a hlawh zui hle a, a damlo tak tak lo nia sawi pawh an awm. Damdawi-inah hian VIP wing-ah dah a nia, thla ruk hnuah parole-a chhuah tir a ni nghal bawk.

Court chuan damdawi-ina Shinwatra dah nghal a ni kha dan a ni lo tiin, jail doctor-te enfiah tir loa police hospital-ah dah a ni nghal chu a dik lo a ni, a ti. Hei bakah damdawi-ina a awm lai hian jail-a dah let a nih lohna turin enkawl a nih dan turah pawh a inrawlh a, dik lo takin a hriselna dinhmun pawh a sawi niin a tarlang bawk. Hei vang hian damdawi-ina a awm hun chhung kha a tan hun angah chhiar tel theih a ni lo tih a sawi. Court-in a chungthu a ngaihtuah lai hian Shinawatra pawh hi a awm ve a ni.

Thaksin hi kum 2001 leh 2005 khan Thailand prime minister atan thlan a nia , kum 2006 khan sipai chakna hmangin paihthlak a ni. Nimina Supreme Court thutlukna siam chu a pawm thu a sawi.