Nepal Prime Minister a bang; Gen Z nawrh huaihawtah mi 19 thi

Nepal prime minister KP Sharma Oli chuan a kaihhruai sorkarin social media platform hrang hrang khapna a tihchhuah avanga nawrh huaihawtnaa buaina nasa tak a chhuah hnuah, prime minister a nihna aṭanga a ban thu nimin chawhnu khan a puang. Sorkar chuan social media platform khapna a siam chu Thawhṭanni zan khan a sut leh nghal bawk.

Kar liam ta Ningani khan Nepal sorkar chuan registration chungchanga dan an siamte an zawm loh avangin social media platform hrang hrang a khap a, heng zingah hian ṭhalaite hman lar Facebook, X, Instagram, X leh WhatsApp bakah YoutTube te pawh an tel. Khapna siam hi duh loin, Thawhṭanni khan ṭhalai rualten nawrh an huaihawtnaa buaina chhuakah mi 19 an thi a, mi 100 chuang an hliam. Nimina nawrh chhunzawmnaa buaina chhuakah mi pahnih an thih belh leh bawk.

Nawrh huaihawt hi Gen Z, kum 1997-2012 inkar mite kaihhruaia neih a ni. Nawrh huaihawtte hian prime minsiter hlui in an hal bakah, hruaitu eng emaw zatte in an suasam tel bawk.

Kathmandu leh khawpui dangahte nawrh hi huaihawt a ni a, Kathmandu-ah chuan nawrh huaihawtte leh police-te innawr buaiin, pungkhawmte hnawhdarh nan police-te chuan rubber bullet-te an hmang a ni. Buaina nasa tak a chhuah hnuah, hemi zan vek hian cabinet chuan emergency meeting nei nghalin, social media khapna sut leh nawrh huaihawtnaa tharum thawhna thlengte chhui chiang tur committee din an rel bawk. Committee hi ni 15 chhunga report theh lut turin a ti a ni. Buaina chhuaka thite puala punkhawm rawtna a awm leh avangin Kathmandu khawpuiah chuan nimin aṭang khan tiam chin awm loin curfew puan a ni. Gen Z chu nawrh titawp turin sorkar chuan a ngen bawk. Mahse, sorkar curfew puan hi ngai pawimawh loin nimin khan sorkar laka lungawi lohna lantirin nawrh hi an nei chhunzawm leh a ni.

Nepal sorkar hian kumin July thla khan Telegram messaging app chu inbumna atan an hmang nasa nia sawiin a lo khap tawh a, a hmain TikTok pawh lo khap tawh bawkin mahse, thla kaw hnuah a khapna hi a titawp a ni.