US-in US Hyundai plant a dapnaah mi 475 hreng

US immigration agent-ten kar liam ta Zirtawpnia Georgia-a US-Hyundai plant an dapnaah, dan loa an rama pem lut leh hna thawk nia sawi mi 475 an hreng a, an zinga a tam ber hi South Korea mi an ni.

South Korea mi tam tak hren an nih avangin nimin khan SKorea sorkar chuan emergency meeting a nei nghal a, an mi hren mekte chungchang buaipui turin Overseas Korean Protection Task Force a din. Foreign affairs minister Cho Hyun chuan a ṭul a nih chuan amah ngei pawh US-ah a kal tur thu a sawi. Hyundai nena plant enkawl duntu, LG Energy Solution chuan US-a sumdawnna thil an kalpui mek tam zawk chu a titawp lailawk tih a sawi bawk.

Immigration agent-te thiltih hian foreign investment tih tumte a nghawng thei dawn nia sawiselna a awm a, mahse, US sorkar chuan thil dik tak an ti niin a sawi ve thung. US president Donald Trump chuan an mi hrente chu dan loa lut an ni a, Immigration and Customs Enforcement (ICE) chuan an tih tur dik tak an ti a ni, a ti. ICE chuan hnathawktu an hrente hi short-term leh recreational visa nei an ni a, heng visa hmanga lutte chu US-a hna thawh phalsak an ni lo tih an sawi.