Japan PM Ishiba a bang

Japan prime minister Shigeru Ishiba chuan rorellai party, Liberal Democratic Party (LDP) phel tur venna atan prime minister a nihna aṭangin a bang.

July thlaa Parliament inthlanpui neihah LDP hi a che ṭha lo hle a, an party mi leh sa eng emaw zat chuan an chet chhiat chhanah mawhphurhna la turin PM hi an phut a, party hruaitu thar thlang tura nawrna a tam hle. Hei vang hian Ishiba chuan party chhunga inṭhendarhna awm tur venna atan, PM a nihna aṭangin a bang ta a ni. LDP leh a thawhpui, Komeito hian Parliament Upper House-ah majority an nei pha tawh lo a ni.

Ishiba hi nikum October thla khan PM atan lak luh a ni a, mahse a prime minister hnuah Parliament lower leh upper house inthlan awmah a kaihhruai ṭangrual pawl chuan majority an la pha lo ve ve a ni. Party chhung aṭangin bang tura nawrna a awm reng chungin Ishiba chuan ban a tum loh thu a lo sawi tawh a, mahse, party hruaitu thlan thar chungchang hi vawiinah an ngaihtuah dawn tak avangin, thutlukna an siam hmain ban a tum thu hi PM office chuan a tarlang tawh a ni.