Israel-in a beih hmain Iran-in uranium a chhek khawl belh: UN agency

United Nations’ nuclear watchdog, International Atomic Energy Agency (IAEA) report chuan kumin June 13-a Israel-in Iran a beih hma khan, Iran chuan ralthuam siamna tur uraninum chu a lo chhek khawl belh niin a tarlang.

Report-ah hian kumin May thlaa Iran-in uranium a chhek khawl chu kg 440.0 chu June 13-a beih a nih khan kg 32.3 chuangin a lo neih belh hman a ni, a ti. Report hi agency-in May 17, 2025 leh June 12, 2025 inkara Iran aṭanga information a lak behchhana siam a ni tih a tarlang bawk. Uranium a chhek khawlte hi ralthuam siamna tura peih thuak tawh, 90% level vel a ni tih a tarlang bawk.

Israel leh US-in June thlaa Iran ralthuam siamna hmun an bomb-te endik turin Iran leh IAEA hian inremna an la siam thei lo tih an sawi bawk a ni. Inbeihna a thlen hnua Iran-in endik a phalsak awmchhun chu Bushehr Nuclear Power Plant chauh niin, hei hi Russia puihna hmanga a enkawl a ni. Thla thum dawn hnuah pawh Iran hian a ralthuam dahna hmunte endik a phalsak lo chu thil pawi tak leh, ngaihven zui ngai tak niin an sawi.