Achitecture award dawng turin Big Ben nominate

England khawpui, London-a Big Ben tower chu kum nga chhung £ mtd 80 hmanga thuam ṭhat a nih hnuah, UK-a architecture award, Royal Institute of British Architects' Stirling Prize dawng turin nominate a ni.

Royal Institute of British Architects' Stirling Prize dawng thei tura nominate zingah hian London khawchhak lam, Olympic Park hluia London College of Fashion leh Cambridge-a AstraZeneca medical research centre te pawh an tel. Appleby Blue Almshouse retirement home leh Japanese-inspired Niwa House pawh nominate an ni bawk.

He award hi a tlangpuiin building sak thar hnenah pek a ni ṭhin. Mahse, building hlui, chei leh thuam ṭhat pawh an huam tel tir tho a ni. Kum 1996 aṭang khan award hi pek niin, a dawng tawh zingah hian Liverpool-a Everyman Theatre, Hasting Piers leh Edinbugr-a Scottish Parliament building pawh an tel a ni.

Elizabeth Tower, Big Ben tia sawi lar hi a tirah chuan Clock Tower tih a ni a, kum 2012 khan Queen Elizabeth II diamon jubilee pualin Elizabeth Tower tiin a hming hi thlak a ni. Sir Charles barry leh Augustus Pugin te desgin a nia , kum 1859 khan siamzawh a ni. Feet 316-a sang a nia, lei aṭanga a dar awmna thleng hian step 334 a awm.