Israel Minister-in Hamas inpek loh chuan Gaza luah ṭan turin sorkar ngen

Israel finance minister Bezalel Smotrich chuan Palestinian firfiak pawl, Hamas in an ralthuamte dah a,an inpek loh chuan Gaza Strip chu luahsak ṭan turin sorkar a ngen.

Far-right minister, Smotrich hi Hamas nena inremna siam duh lotu langsar tak a nia , Ningania Jerusalem-a press conference a neihah kumin kumtawpa Gaza-a hnehna an chan theihna tura ruahmanna a siamte a sawi a ni. Hamas chu an inpe a, an ralthuamte tung a, a mi hren mekte pawh chhuah vek turin hun bituk sak a, hei hi Hamas lamin an zawm loh chuan kar tin Gaza Strip-a bial hrang hrangte chu Israel-in luahsak belh zel a, a puma a thunun vek hma chu hetianga tih chhoh zel hi a rawt.

Smotrich chuan Palestinian-te chu Gaza chhim lamah insawn tura hrilh hmasa a, hemi hnuah a ram hmarlam leh ram laili laia Hamas la awmte chu nuai chimih a, an ram luah sak a rawt a, 'Hei hi thla thum thla li chhungin kan tifel thei ang," a ti. A ruahmanna siamte chu pawm a, hmang thuai turin prime minister Benjamin Netanyahu chu a ngen bawk.

Israel cabinet-in an thununna hnuaia Gaza City dahna tura ruahmanna a lo pawm tawh bawhzuiin, sipaite chuan Ningani khan Gaza City daiah beihpui an thlak chhunzawm leh. Ram hrang hrangten an dem thu an sawi chungin, Israel chuan Gaza City hi a thununna hnuaia dah ngei a tum a ni. Palestinian lam chuan Ningania Israel sipaite beihpui thlaknaah hian mi 16 an thi niin an sawi.