Minneapolis Catholic school beihnaah zirlai 2 an thi

US-a Minneapolis Catholic school zirlaite chu Nilaini zinga Mass an hman laiin silai keng mi pakhatin a pawng kah a, zirlai naupang pahnih, kum 8 leh kum 10 mi an thi a, hliam 17 an awm bawk. Silai hmetpuaktu hi a inkaphlum zui ve nghal a ni.

Annunciation Catholic School zirlaite chu Thawhṭanni khan sikul hi an lut ṭan a, Nilaini zing khan zirlai zir ṭan hmaa biak-ina mass an hman laiin pawikhawihtu, kum 23 mi Robin Westman hian tukverh aṭangin a pawng kah a ni. Hliam tuar zingah hian zirlai naupang 14 an tel a, kum 6 -15 inkar an ni. An ngaihtuahawm lutuk lo nia sawi a ni. Puilting hliam tuar pathumte hi kum 80 bawr vek an ni bawk.

Federal Bureau of Investigation (FBI) chuan pawikhawihna thleng chungchangah firfiaka chetna nen inzawm leh, Catholic huatna lam thil a ni em tih an chhui nghal thu FBI director Kash Patel chuan a sawi. Police hotu, Brian O'Hara chuan naupang pawisawi lo, Pathian biaa awm khawmte beih an ni chu a nunrawnthlak takzet tih a sawi bawk.

US president Donald Trump chuan pawikhawihna rawng tak thleng vanga thite sun leh zahna lantirna atan Pathianni thleng an rama sorkar building zawng zawngah hnam puanzar a ngul chanveah zar vek turin a ti.

Pawikhawihtu, Robin Westman hian a hmain a YouTube channel-ah a silai neihte tilangin, 'kill Donald Trump' , 'Israel must fall' leh 'nuke India' tihte a inziak. Sikul a beihnaah hian a silai pathumte a hmang a, vawi tam tak a kap nia sawi a ni. A silaite hi dan ang thlapa a lei vek nia sawi a ni bawk. Pawikhawihna thlen hnuah a YouTube channel hi thuneitu lamin an titawp a ni. Court report-a a lan danin, Westman hi a hming tak chu Robert Westman a ni a, mahse kum 2022 khan a nihna thlak thlengin, 'transgender woman' a inti a, a hming pawh Robin Westman tiin a thlak bawk. Annunciation Catholic School-ah hian kal tawhin, 2017 yearbook-ah pawh a lang a ni.