Vietnam-ah ruahsur vanga chhiatna thlengah mi 8 an thi

Vietnam ramah thlipui, typhoon Kajiki a tleh hnuah ruah nasa takin a sur zui a, an ram hmarlam leh ram laili laiah tuilian leh leimin eng emaw zat thlengin, chhiatna thleng vangin mi pariat an thi.

Thawhlehni zana hmarchhak lama ruahsur chu cm 20 dawn a tling a, tuipui kam hnaih bialah warning tihchhuah a ni bawk. Chhiatna thleng vang hian mi 34 in hliam an tuar tih state media chuan a tarlang bawk. Tuilian hian thlai chinna ram hectare 86 chuang zau bakah chenna in leh office 10,000 chuang a chim bawk a ni. Vietnam khawpui, Hanoi kawtthlerah pawh tui a tling nasa hle.

Thailand-ah pawh nimin khan leimin vangin mi pakhat a thi a, chin hriat lohin pakhat a awm bawk. Thailand department of disaster prevention and mitigation chuan an ram hmarlamah mi eng emaw zatin tuilian leh leimin vangin harsatna an tawk a, hliam pawh an awm tih a tarlang. Meteorological Department chuan an ram hmar leh hmarchhak lamah ruah a la sur chhunzawm dawn tih sawiin, mipuite fimkhur turin an chah.

Typhoon Kajiki hian Vietnam a thlen hmain China chhim lama Hainan Island a lo nuai tawh a, water supply system a tihchhiat bakah infrastructure pawh a tichhe nual bawk.