Ram eng emaw zatin US-ah postal service titawp

US president Donald Trump-a'n chhiah lakna thar a siamah, low-value package te ngaihhnathiam an nih ṭhinna a tihtawp avangin ram eng emaw zatin US-a postal service an titawp lailawk.

Kumin July thla khan Trump chuan chhiah lakna thar tur executive order siamin, a hmaa US-a bungraw thawn luh, USD 800 aia tlem china chhiah ngaihhnathiamna awm chu titawpin chhiah an la tel tawh dawn a ni. Kum 2016 aṭanga an dan hmana ngaihhnathiamna siam hi kumin August 29 hian a tawp dawn a, hemi hnuah chuan postal department kaltlanga bungraw tenau thawn luhah pawh chhiah hi lak tel a ni tawh ang.

US-a postal service titawp zingah hian Italy, Germany, UK, India, Belgium, Denmark, New Zealand leh France pawh an tel a, ram dang pawhin tihtawp an tum tih an sawi hlawm bawk. Ram hrang hranga postal service-te chuan chhiah lak dan thar hi a la chiang lo hle tih an sawi a, US chu sawichiang turin an phut.

President Trump-a'n chhiah lak dan tur a siam tharah, department of posts kaltlanga bungrua, USD 100 man chin hnuai lam chu chhiah lak a ni dawn lo a, a bak erawh lak vek a ni ang. Document leh lehkhathawn pangngaite erawh a nghawng tel lo thung.

Kum 2024 khan parcel te, chhiah laksak lo chi hi US-ah mtd 134 vel thawn luh a ni a, a tam ber hi China leh Hong Kong aṭanga thawn an ni.