Israel-in Yemen khawpui bei

Israel chuan Yemen-a Houthi hel pawlin missile hmanga an beihna chhang letin, Pathianni khan Yemen khawpui Sanaa chu thlawhtheihna hmangin a bei a, mi paruk an thi a, hliam 86 an awm niin Houthi official-te chuan an sawi.

Israel sipaite chuan Sanaa-a Houthi ho hmun an beih zingah hian an presidential palace awmna hmun bakah power plant leh storage site-te a ni tih an sawi. Thuchhuah an siamah, Houthi hoin surface-to-surface missile leh UAV hmanga tun hnaia Israel ram a beih fo an chhan letna a ni tih an tarlang bawk.

Houthi hian kar liam ta Zirtawpni khan Israel beihna atan ballistic missile an kap chhuak tih an sawi a, Gaza-a Palestinian te an thlawpna an lantirna a ni tih a sawi. Kum 2023-a Hamas-ten Israel an beih avanga Gaza Strip-a Israel leh Hamas indona a thlen hnuah, Houthi hian Hamas an thlawpna lantirin Red Sea-a sumdawng lawng lian kalte pawh an lo bei tawh bawk a ni. Hei bakah missile eng emaw zatin Israel an kap tawh bawk. Mahse, an missile kah chhuah zinga a tam zawk chu Israel hian a lo kap thla a ni.