NKorea hotuin Russia puitu an sipaite a fak

North Korea ram hotu, Kim Jong-un chuan Russia-in Ukraine a donaa Russia ram pui tura NKorea sipai tirhte chu fakin, sipai huaisen tak an nih thu a sawi.

Nilainia an ram khawpui, Pyongyang-a sipai hotute nena an inkawmnaah Kim chuan he thu hi a sawi a, "Kan sipaite an tih tur dik tak an ti mek a, hun lo kal zelah pawh an la ti zel dawn a ni," a ti.

Russia-Ukraine indonaa Russia pui turin NKorea chuan sipai ṭhahnem tham tak a tir niin US leh khawthlang ramte chuan an sawi fo a, kumin April thla khan Kim chuan sipai an tirh thu hi a sawichiang ta a, mahse an tirh zat tak erawh a sawi lo.

South Korea leh khawthlang ram intelligence agency-te chuan NKorea hian kum 2024 khan Kursk bialah Russia sipai pui turin sipai 10,000 chuang a tir tih an sawi. Sipai tirh zinga 600 chu indonaah an thi a, hliam tuar tam tak an awm bawk tih SKorea chuan a sawi.