Brazil President hlui Argentina-a tlanchhiat tumah a puh

Brazil police-te chuan an ram president hlui, house-arrest a hren mek, Jair Bolsonaro chu a phone message aṭangin Argentina-a tlanchhiat a, humhimna dil a lo tum tawh niin Nilaini khan an tarlang.

Kum 2023-a an ram president thlanna neihah a chak zawh loh hnuah, Bolsonaro hi sorkar paithlak tuma puha tum niin, a thubuai hi Supreme Court-ah ngaihtuah mek a ni. Nilainia police-ten document an tihchhuahah, thubuai siamsak a nih hnuah Argentina-ah tlanchhiat a tum tih hi tarlan a ni.

Police-te hian Bolsonaro-a text message leh voice message thawnte pawh endik vekin, an zirchianna report phek 178-a chhah chu court-ah hian a pe a ni. Report an thehluhah, kum 2024 February 10 khan Bolsonaro chuan Argentina president Javier Milai hnenah humhimna pe tura ngenna thawn tur a duan lawk chu an hmu tih an sawi. Hei hi sorkar paihthlak tuma puhna chungchanga a chenna in leh office-te dapsak a nih hnu ni hnihah a siam tih an tarlang. A dilna siamah hian Brazil-a politics inbeihna avanga a dinhmun, a nunna thleng atana a hlauhthawn thu sawiin, chhui mek a nih chungchang erawh a tarlang lo. A ngenna siam hi Argentina president thupuangtu chuan a chhang nghal lo niin an sawi bawk.