Serbia-ah nawrh huaihawtten rorellai party office an hal

Serbia rama sorkar laka lungawi lohna lantirtuten Inrinni zan khan Valjevo khawpuia rorellai party, Serbian Progressive Party (SNS) office an hal. Nawrh huaihawtte leh riot police-te nasa takin an innawr buai zui bawk.

SNS office an hal hi a ruak nia sawi a ni, police-te chuan pawikhawihtute chu stun grenade leh tear gas nen an bei zui a ni. Hetih lai hian ram hrang hrangten police-te chet dan hi an sawisel nasa hle.

Serbia sorkar laka lungawi lohna hi nikum Novembre thlaa Novid Sad-a rel station a chim aṭangin boruak a awm a, he chhiatna thlengah hian mi 16 an thi a ni. Mi tam takin he thil hi eirukna nasat vang leh, sorkarin chhiatna thleng thei laka invenna tur sum dah a tihtlem vang niin an puh. Eiruk duh lohna lantirin an ram khawpui hmun hrang hrangah nawrh huaihawt chhunzawm a ni. Hetih lai hian sorkar thlawptu lamten punkhawmna an lo buatsaih ve bawk.

Kar liam ta Nilaini thleng khan nawrh huaihawt hi boruak ṭha tak hnuaia kalpuiin buaina lian tham chhuak a awm lo a, mahse Inrinni zan khan tharum thawhna hi a thleng ta a ni. Nawrh huaihawtte hian SNS office an hal bakah a thawhpui, Serbian Radical Party, headquarters tukverhte an tichhe bawk a ni.

Serbia president Aleksandar Vučić chuan tharum thawhna thlen chu chak lohna lantirna a ni zawk tiin, pawikhawihtute chu hrem a tiam. Inthlan buatsaih hma tura ngenna pawh hnawlin, an rama nawrh huaihawt ṭhin chu ram dangten amah paihthlak tuma an phiarrukna pakhatah a puh.