Pakistan-a chhiatna thlengah mi 300 chuang thi; Chhan chhuah hna thawktu helicopter a chesual

Pakistan leh Kashmir-a Pakistan rorelna huam chhungah Inrinni khan ruahsur nasa avangin tuilian leh leimin eng emaw zat a thleng a, chhiatna thlenga thi hi mi 307 an tling tawh. Chhiatna tawkte chhan chhuah hna thawktu helicopter a chesual a, thawktu panga an thi bawk a ni.

Chhiatna thleng vanga thi tam ber hi Pakistan hmar thlang lam, Khyber Pakhtunkhwa province-a mite an ni a, chenna 74 a chhe bawk. Pakistan-administered Kashmir-ah mi pakua an thi a, Gilgit-Baltisan bialah mi panga an thi bawk.

Sorkar chuan an ram hmar thlang lamah hian August 21 thleng ruah nasa takin a la sur chhunzawm dawn niin a sawi a, hei vang hian hmun eng emaw zat chu disaster zone-ah puan a ni.

Khyber Pakhtunkhwa chief minister Ali Amin Gadapur chuan leimin nasa tak thlenna, Afghanistan ramri bula chhan chhuah hna thawk tura kal, M-17 chu Bajaur pana a thlawh laiin a chesual tih a sawi.

Pakistan-ah hian June leh September thla inkar hian ruahsur vangin chhiatna a thleng fo a, kuminah pawh chhiatna thlengah mi 650 vel an thi tawh a ni.