Europe-ah ram kang nasa tak thleng mek

Europe chhim lamin khaw lum nasa tak an tuar mek a, ram ṭhenkhatah ram kang thlengin mi tam takin harsatna an tawk. Ram kang vang hian mi pahnih an thi tawh a, mi sang telin an in leh lo an tlanchhiatsan tawh bawk.

Spain ram khawpui, Madrid bial huam chhung bakah hmar thlang lam, Leon leh chhim lamah Cadiz-ahte ram a kang a, interior ministry chuan 'pre-emergency' a puang. Ram kang vang hian mi pakhat a thi a ni. Kangṭhelhtute pui turin sipai 1,000 thawn luh an ni tawh. Kangmei chhuahna biala cheng mi eng emaw zat chu hmun him lamah sawnchhuah an ni a, Madrid-Galicia inkara high-speed train service pawh tihtawp a ni. Spain ram hmun ṭhenkhatah khaw lum lam hi 44 degree celsius te a tling.

France chhim thlang lam, Aude bialah ram kang vangin mi pakhat a thi a, mi tam tak an hliam bawk a, an zingah hian kangṭhelhtute pawh an tel.

Portugal ram hmar lamah pawh kangṭhelhtu 700 chuangin an ṭhelh mek a ni. Thuneitute chuan kang ṭhelhna tur Canadair thlawhtheihna pahnih a chhiat avangin Morroco puihna an dil thu an sawi. Kangṭhelhtu 1,200 bakah thlawhtheihna hmangin ram kang hi ṭhelh a ni a, an ram hmun hlui pawimawh tak Trancoso bul chu a kang nasa hle a, ram hectare 3,000 chuanga zau a kang tawh a ni.