US leh China-in inremna siam hun pawtsei
US leh China chuan insumdawnna atana inremna siam hun chu November 10-ah an pawtsei. Hei vang hian chhiah sang zawk lakna tura an duan chu ni 90 chhung tihkhawtlai a ni leh dawn ta a ni.
US president Donald Trump-a'n ram dang aṭanga bungrua lakluhah chhiah sang zawk lakna tur a siamah, China bungruaah 145% a lakna tur a siam a, China pawhin chhang let ve nghalin US aṭanga bungrua an chawk luhah chhiah 125% lak a ni dawn tih a sawi ve bawk. Mahse May thlaa ram pahnih aiawhte an inbiak hnuah chhiah lak tum chungchangah an inbengdai a, US hian 30%-ah siamin China-in 10% ah a tihniam bawk a, mahse inremna tak erawh an la siam lo.
White House chuan inremna siamna tur atan inbiakna hun tam zawk neih leh chu ram pahnihte insumdawn tawnna kawnga inkhuangrual lo awmte siamṭhatna tur atan a nih thu a sawi.
President Trump-a trade policy hnuaiah US-in ram dang bungrua an chawkluha chhiah a lak, chawhruala kumin kumtira 2.5% chu 18.6% ah a chho a, kum 1933 hnua a san lai ber a ni.