US-in BLA leh Majeed Brigade firfiak pawlah a puang

United States chuan Thawhṭanni khan Bangladesh-a Balochistan Liberation Army (BLA) leh a thawhpui, Majeed Brigade chu firfiak pawl, Foreign Terrorist Organisation (FTO) ah a puang. Majeed hi Specially Designated Global Terrorist (SDGT) ah telh a ni bawk.

US secretary of state Marco Rubio chuan thuchhuah siamin, kum 2019 aṭang khan BLA hian pawikhawihna thlentu an nih thu a sawi fo a, anni bakah Majeed Brigage pawhin pawikhawihna hi an thlen fo a ni, a ti.

BLA hi kum eng emaw chen chu US hian a lo zirchiang tawh a, kum 2019-a firfiaka chetna eng emaw zata an inhnamhnawiha sawi a nih hnauh SDGT-ah a dah a ni. Hemi hnuah ṭum eng emaw zat pawikhawihna an thlen zawm a ni. State Department chuan kum 2024-a Karachi airport bulah leh Gwadar Port Authority Complex-a thihchilh bomb tipuaktu chu BLA an ni tih a sawi a, kumin March thla khan an pawl hian Quetta aṭanga Peshawar pan Jaffar Express rel chu beiin, civil mi 31 bakah venhim hna thawktu pakhat an that. Khualzin 300 te chu an inbeih chhung chuan an hreng bawk.

Civil mite himna tiderthawng leh, an ram leh a chhehvel tibuai zawnga an chet chhunzawm reng avangin firfiak pawlah an puang tih State Deparment thuchhuah chuan a tarlang.

US hian a hmain Pakistan-a hmunpui nei, Lashkar-e-Taiba (LeT) hnuaia mi, The Resistance Front (TRF) chu Foreign Terrorist Organisation ah a lo puang tawh bawk.