Imran Khan chhuah phûtin nawrh huaihawt

Pakistan Tehreek-e-Insaf (PTI) party chuan jail-a tang mek, an party hruaitu leh prime minister hlui Imran Khan chhuah phûtin Thawhlehni khan ram chhung hmun hrang hrangah nawrh an huaihawt. Nawrh huaihawtnaa party worker 500 chuang man an ni.

Imran Khan hi Prime Minister a nihna aṭanga paihthlak a nih hnuah kum 2023, August 5 khan eiruk thubuaiah thiam loh chantirin man a ni, Rawalpindi-a Adiala Jail-ah a tang mek a ni. Thubuai dang eng emaw zat a nei mek bawk.

PTI hruaitu Zulfi Bokhari chuan Thawhlehni khan dik lo taka PM hlui Imran Khan tantir a nih champha vawi hnihna a nih thu sawiin, a thubuai ngaihtuahnaah pawh a dikna chanvo neihte rahbehsak a ni, a ti. Hemi nia nawrh huaihawt an tum vang hian sorkar chuan punkhawm khapna thupek a tichhuak a, kawngpuite dangin party flag tarna motor-te an ti chhia a, party hruaitu leh worker-te chenna in eng emaw zat an dap bawk tih a sawi.

"Democracy a awm tawh lo a, dan leh thupek bakah mihring dikna chanvo te pawh a awm tawh lo. Hetianga Pakistan mi ngei chunga rawng taka rorelsakna hi a zahthlak takzet a ni," a ti. Khawpui eng emaw zatah Khan-a thlawptute leh police-te an innawr buai a ni.

Party worker-te nawrh huaihawt vang hian Adiala Jail-ah pawh venhimna tihkhauh a ni a, Riot Mangement Force unit dah an ni a, Adiala Road pawh khar a ni bawk.

PTI in nawrh an huaihawt hma lawk, thla liam ta khan an party member 108 chu kum 2023-a Khan man a nih duh lohna lantirnaa buaina chhuak kaihhnawiha thubuai siamsakah thiam loh chantir an ni. An zingah hian MP te pawh an tel.

Kum 2024 inthlanpuiah khan PTI hi party mala seat la hnem ber an la ni a, mahse party dangten ṭangrualin prime minister Shehbaz Shafir kaihhruaina hnuaiah sorakr an siam a ni.