Brazil President hlui Bolsonaro house arrest-in hreng

Brazil Supreme Court-in Thawhṭannia thupek a tihchhuah angin, an ram president hlui, Jair Bolsonaroa chu a chenna inah pawn chhuak thei loa hren a ni.

Jair Bolsonaro hi 2022 President thlannaah a chak zawh loh hnuin sorkar paihthlak tuma puhin thubuai siamsak a ni. Prosecutor-te chuan Bolsonaro hian inthlan result tibuai a, thlak danglam tum criminal organisation a kaihruai niin an puh. Hei bakah president atana thlan tlin Luiz Inácio Lula da Silva leh Supreme Court justice Alexandre de Moraes thah tumah puh a ni bawk.

July thla khan Supreme Court chuan Bolsonaro hi a awmna chin hriat a nih theihna turin electronic ankle monitor vuah turin a ti a, a thil tih tur chinah pawh khuahkhirhna a siamsak bawk a ni.

Court-in house arrest thupek a tihchhuah thar hnuaiah hian Bolsonaro hi a chhungte leh lawyer bak a hmuh phalsak a ni dawn lo a, Rio de Janeiro-a a chenna ina mobile phone awmte pawh lak vek a ni. Mi dang phone a hman pawh khapsak a ni bawk.

Bolsonaro thubuai ngaihtuahtu, justice Moraes chuan kum 70 mi, an ram president hlui hian a laka khuahkhirhna siam bawhchhiaiin, a fapate social media channelah thuchhuah siamin, Supreme Court bei turin mipuite a fuih a, Brazil rorelnaah ram dang inrawlh a thlawp a ni, a ti.

Pathianni khan Bolsonaro thlawptute chuan Sao Paulo leh Rio de Janeiro-ah kawng zawhin, Brazil Congress chu Bolsonaro bakah 2023, January 8-a sorkar building beihnaah inhnamhnawiha puh thubuai siamsakte chu ngaidam turin an ngen.

Bolsonaro hian an puhna hrang hrangte chu thu dik lo niin a sawi a, judge Moras chu 'dictator' tiin a sawi. US president Donald Trump pawhin Bolsonaro hi thlawpin a laka dik lo taka rorelsak a nih dan chu titawp turin a lo ti tawh bawk. Judge Moraes chu a thuneihna hmang dik lo leh, mimalin a duhzawng sawi tura zalenna a neih hreksakah puhin, July thla tawp lam khan US chuan Moraes hrekna hi a siam a ni.