Toilet graffiti ziaktu kum 7 tang maithei

Hong Kong police-te chuan Nilaini khan commercial building-a inthiarna hmun banga sorkar dodal leh huatna lam hawi ziaktu, mipa kum 18 mi an man tih sawiin, kum sarih thleng tantir theih a ni dawn tih an sawi.

Toilet banga graffiti ziah hi Hong Kong sorkar sawichhiatna leh huatna chawk chhuak thei a ni tih police-te chuan an sawi a, a thu ziah tak erawh an sawilang lo. Graffiti ziaktu hi Nilaini khan court-ah hruai a ni a, sorkar laka hel tura mi dangte fuiha puhna thubuai siamsak a ni. Secondary school zo hlim, part-time clerk-a thawk mek niin, July 17 - 21 inkar khan a ziak niin an sawi. Sorkar laka hel tura fuiha puhna thubuai siamsak hi kum sarih thleng tantir theih an ni a, he tlangval pawh hian hremna hi a hmachhawn a ngai dawn a ni.

Democracy thlawptuten Hong Kong-a nawrh huaihawt a, nawrh huaihawtna hmuna buainate a chhuah hnuin kum 2020 khan China chuan national security law chu Hong Kong-ah a hmang ṭan a ni. He dan hnuaiah hian sorkar dodal zawnga chete chu hremna na zawka pek theih an ni. Kumin July 1 thleng khan he dan hmang hian mi 333 man an ni tawh a, an zinga 165 chu thiam loh chantir an ni.