Mi 49 chuanna Russia thlawhtheihna a tla

Russia khawchhak lam, Amur bialah nimin khan mi 49 chuanna khualzin phur thlawhtheihna a tla a, a chuangte hi an thi vek nia hriat a ni.

Emergency ministry chuan khualzin phur, Antonov-24 thlawhtheihna hi air traffic controller lamin an biak pawh theih loh hnuah, Russia civil aviation authority, Rosaviatsiya Mi-8 helicopter chuan Tynda aṭanga km 16 vela hlaah thlawhtheihna kang hi a hmu ta niin a tarlang.

Thlawhtheihnaa chuang zinga 43 chu khualzin niin an zingah hian naupang panga an tel a, crew member paruk an awm bawk. China ramri bulhnai, Blagoveshchensk aṭanga Tynda khaw pana thlawk a ni. Amur region civil defence agency chuan thlawhtheihna tlakna hmunah chhanchhuah hna thawktute tirh nghal an ni tih a sawi.

Khawvel huapin kumina thlawhtheihna chetsualna a thleng ngun tawh hle a, thlawhtheihna tla avanga thi hi nimina Russia thlawhtheihnaa chesuala thite chhiar tel loin mi 460 an tling tawh. Aviation safety chungchang zirtu, German consulting firm Jacdec chuan kum 10 liam ta chhung khan chawhrualin kum khata thlawhtheihna chesuala thi hi mi 284 ang zel a nih thu a sawi.