Japan ram inthlanah rorellai che ṭha lo

Japan Parliament upper house inthlan, Pathiannia neihah rorellai, prime minister Shigery Ishiba kaihhruai ṭangrual pawl an che ṭha lo a, majority an nei pha lo.

Seat 248 awmna upper house-ah PM Ishiba party, Liberal Democratic Party leh a thawhpui, Komeiti party chuan an seat neih sa, 75 aṭangin majority nei turin seat 50 an neih belh a ngaih laiin seat 47 chauh an la pha. Upper house-a an chak loh avang hian sorkar thlak ni dawn lo mah se an result hian kumin October thlaa sorkarna siam thei tur zawnna, lower house inthlan neih tur a nghawng a neih rin a ni.

PM chuan upper house-ah chak zo lo mah se sorkarna an siam chhunzawm zel tur thu a sawi. Mahse eptu party lam chuan sorkar rin tawk lohna motion put luh chungchang an sawi ri thung.

Pathiannia inthlanah hian far-right Sanseito party an rawn che ṭha hle. Covid-19 hri len lai, kum 2020 a YouTube kaltlanga din, Sanseito party hi Covid vaccine dodaltu niin, party president Manabu Matsuda phei chuan tualthahna hmanrua tiin a sawi. Mahni anpui kawp/neih dotu an ni bawk a, mipuiin mahni anpui kawpte an hrethiam leh pawm mai ṭhin chu an sawisel nasa hle. Ram dang aṭanga Japan-a pem luh thlawp lotu, ram dangin an chim nasat duh lotu an ni bawk. An party hian ngaihven an hlawh chho hle a, kum thum liam taa upper house-a seat pakhat chauh an neih laiin, Pathiannia inthlanah seat 14 an la thei a ni. Mahse lower house-ah erawh seat thum chauh an la nei thung.