UK sorkarin vote thlak thei kum bithliah tih hniam tum

UK sorkar chuan vote thlak thei chin, kum 18-a bihthliah chu kum 16-ah tih hniam a tum. Hei hi rorellai, Labour party in inthlan dawna an intiamna a ni. Kum 1969 khan vote thlak thei chin hi kum 21 aṭangin kum 18-ah tih hniam a ni.

Sorkarin ruahmanna a siam, policy paper-ah chuan an ram inthlana donation kaltlanga ram pawn lam aṭanga an rawn inrawlh ṭhinah pawh khuahkhirhna siam tum a ni bawk. Hemi hmang hian 'shell company' te chu donation pek khap an ni ang.

Electoral Commission chuan vote thlak thei chin zingah mi mtd 7-8 vel chu an inziak lut lo niin a sawi. Ruahmanna an siam tharah chuan registration hi kum 14 an tling aṭangin neih ṭan a ni ang a, kum 16 an tlinah vote hi an thlak thei dawn a ni. Sorkar chuan polling booth-ah an nihna finfiahna tur hian UK bank pek chhuah card siam a tum bawk. Hei bakah digital veteran card leh driving license pawm a ni dawn bawk a ni.

Prime minister hlui Rishi Sunak kaihhruaina hnuaiah kum 2023 khan Conservative sorkar chuan ID pek chhuah danah khauh zawka kalpuina tur a lo siam tawh a, hei hi dik lo taka vote nei awm ṭhin venna atana a tih a ni.

Rawtna siam thar hi pawm a nih a, dan ah chantir a nih chuan Labour party hian an hlawkpui tura rin a ni. UK-a vote naupang leh ṭhalai zawkte chuan centre-left leh left party-te an vote tlangpui a ni. Kum 2024 inthlanah khan kum 18-24 inkar zinga 41% chuan Labour party hi an vote a, hetih lai hian kum 70 chunglamah pawh 20% chauhin an vote thung.

Prime minister Keir Starmer chuan kum 16 leh 17 te chu hna thawka kal chhuak tur te, chhiah pe turtein an upa ve tawk tawh a, hei vang hian vote an neih ve theih ngei chu a pawimawh a ni, a ti.