Romania-in Israel Iron Dome a lei dawn

Romania chuan an ram venhimna thuam chakna turin Israel siam, Iron Dome air defence system a lei dawn a, Europe ram zingah lei hmasa ber tur an ni.

Romania defence minister Ionut Mosteanu chuan Iron Dome air defence system an lei tur hi a sawichiang tawh a, SHORAD-VSHORAD system leina tura inremna chu kumin favangah ziah fel hman tum a ni, a ti. Minister chuan, "Heng hi defensive missile battery kan neih loh, kan mamawh si a ni," tiin tun hnaiah Iran-in missile hmanga Israel khawpui, Tel Aviv an beih khan Iron Dome, SHORAD-VSHORAD hnathawh ropui tak hmuin, Tel Aviv chu a venghim a ni, tiin a sawi. Hei vang hian an ram hmun pawimawh tak tak - airport, military base leh hmun dang pawh a venghim thei dawn a, an khawpui venhimna turin an mamawh tih a sawi.

Israel siam Iron Dome hi short leh very short-range missile lo dang thei tura duan niin, urban area bakah infrastructure pawimawh venhimna atana ṭangkai tak a ni.

Mosteanu chuan an ram venhimna atana sipaite hman tur hmanrua leina atan defence budget aṭanga 30% dawn chu dah a ni tih a sawi a, short-range missile leh indo lawng, corvette pawh an la lei tur thu a sawi bawk.