Kentucky biak-ina inkahna thlengah mi 2 an thi

US-a Kentucky state-a Lexington khuaah Pathianni khan Richmon Road Baptist Church-ah mi pakhatin silai a pawng kah a, mi pahnih a kap hlum. Police-te chuan pawikhawihtu hi an kap hlum ve nghal nia sawi a ni a, mahse a nihna erawh puanzar a la ni lo.

Pawikhawihtu hi chawhma dar 11:30 vel khan Blue Grass Airport, Fayette County bulah state trooper pakhat chuan a motor register a dik lo nia hriain a lo ti ding a, ani hian silaia lo kapin a tlanchhe zui a ni. Trooper hian hliam a tuar a, damdawi-inah enkawl mek a ni. Hemi hnuah pawikhawihtu hian airport aṭanga km 16 vela hlaa mi pakhat motor chu chhuhsakin Richmond Road Baptist Church lam a pan a, biak-in pawn lama lo awmte a pawng kah ta a ni. Biak-in pawna awm a kah hlumte hi hmeichhe pahnih, kum 72 leh 32 mi an ni. Mi dang pahnih a kap hliam bawk a ni.

Kentucky state police chuan pawikhawihtu hi kah hlum ve nghal a nih thu sawi mah se, khawi hmunah nge kah hlum a ni tih erawh an sawi lo a, a hming pawh puan a la ni lo.