Australia-ah ram 19 sipaiten nunchan zir

Australia ramah sipai nunchan zirna lian, Exercise Talisman Sabre chu Pathianni, July 13 aṭang khan neih ṭan a ni a, ram 19 aṭangin sipai 35,000 an tel.

Talisman Sabre hi kum 2015 aṭanga US leh Australia-in an buatsaih dun ṭhin a ni. Kumina joint exercise neihah erawh ram 19 an tel a, kar thum a awh dawn a ni. Sipai nunchan zirna hi Australia ram bakah an ṭhenawm, Papua New Guine-ah pawh neih tel a ni dawn a, Australia ram pawn lama an neih tel hmasak berna tur a ni.

Joint military exercise hawnna hi Pathianni khan Garden Island, Sydney khawpuiah neih a ni a, US Army Pacific-a deputy commanding general Lt. Gen. JB Vowel leh Australia chief of joint operations Vice-Adm. Justin Jones ten an telpui.

China chuan Australia-a joint military exercise neih hi a ngaihven hle a, an thlithlai reng dawn tih an sawi ve nghal a ni. Australia sorkar pawhin alo enthlak reng a rin thu a sawi bawk.

Kuminah hian live-fire exercise leh field training activity-te neih a ni dawn a, ram hrang hrang sipai kalkhawmte hian khawmual, boruak leh tuipuia indona thlen palha chet lak dan turte an zir ho dawn a ni. Nunchan zirnaah hian UH-60M Black Hawks leh Precision Strike Missile te pawh hman an ni ang.