SKorea medical zirlaiten thla 17 hnuah nawrh ti tawp

South Korea-a medical zirlaiten kum 2024 February thla aṭanga lungawi lohna lantira class an boycott chu thla 17 liam hnu, nimin khan an ti tawp ta. Junior doctor-te nawrh pawh tih tawp a ni ve nghal bawk.

South Korea president hlui, Yoon Suk Yeol-a'n medical school admission tih pun a tum vangin zirlaite hi an lungawi lo a, junior doctor-te an nawrh bakah medical zirlaite chuan class an boycott bawk. Yoon hian medical student quota chu 2,000 a tih pun a tum a, hei hi doctor leh zirlaite chuan duh loin, seat tam tak tih pun ringawt chuan medical zirna quality a ti hniam zawk dawn niin an sawi. Seat awm zat tih pun ai chuan zirna lam siamṭhat a pawimawh tih an sawi a ni. Hun rei tak nawrh an huaihawt vang hian an ram healthcare dinhmun pawh a tih buai phah hle a ni.

Martial law a puan avanga President aṭanga Yoon paihthlak a nih hnuah, kumin March thla khan sorkar chuan fee tih sanna hi sut a tiam a ni. Tun thla tir lamah khan President thar Lee Jae Myung chuan health sector siam ṭhat a ni dawn tih sawiin, nawrh huaihawtte pawh inbiakna neihpui turin a sawm bawk. Inbiakna an neih hnuah zirlaite leh junior doctor-te hian nawrh hi tih tawp an rel ta a ni.

Korean Medical Student Association chuan National Assembly-a education and welfare committee leh Korean Medical Association member-te nena joint press conference an neihah nawrh tih tawp a nih thu hi an puang. Medical zirlaite hian class boycott hi ti tawp mah se, class an zawm ṭan hun tur erawh an la sawi chiang lo thung. Nawrh huaihawt hian medical zirlai 8,300 vel bakah junior doctor 12,000 vel an tel.