Britain-ah dan pawna hnawl Palestinian pawl thlawpna lantirtute man

Britain sorkarin dan pawna a hnawl, Palestine Action pawl thlawpna lantirtu mi 70 chuang chu Inrinni khan man an ni.

Palestine Action pawl hian Royal Air Force base luh chilhin an suasam hnuah, Britain sorkar chuan firfiak pawlah puangin, dan pawnah a hnawl a ni. Hetih laiin Palestinian thlawptute chuan dan pawna hnawl an ni chu duh loin lungawi lohna an lantir a ni. London-ah mi 42 manin, Manchester-ah mi 16 man an ni a, Cardiff-ah mi 13 man an ni bawk. Nawrh huaihawtte hian flag leh logo te kengin an au rual bawk. London-ah hian Palestinian activist group thlawpna hi a hma karah pawh lantir a lo ni tawh bawk a, hemi ṭum hian police-ten mi 29 an man.

Britain sorkarin Terrorism Act 2000 hnuaiah Palestine Action pawl hi firfiak pawlah a puan tel tawh avangin, he pawl member nih leh, an thiltih lo thlawptu chu man a, kum 14 lung-in tantir theih an ni tawh a ni. He dan hnuaiah hian pawl 81 chu dan pawnah hnawl an ni tawh a, an zingah hian Hamas leh al-Qaida pawl pawh an tel.

Palestine Action activist-te hian June 20 khan Oxfordshire, England-a Brize Norton-a Royal Air Force base luhchilhin, thlawhtheihna dingte chu hmanraw hmanga an beih bakah rawng senin an kap bawk. Hei hi Gaza Strip indona thleng meka Britain sorkarin Israel a thlawp avanga an lungawi lohna lantirna atana ti an ni. Police-te hian an thiltih chhiat hi USD mtd 9.4 hu a tling tih an sawi. Hemi kaihhnawihah hian Palestinian thlawptu pawl mi leh sa pali chu thubuai siamsak an ni a, July 18 hian London-a Central Criminal Court-ah an inlan ang.