NKorea hotuin Russia an thlawp thu sawi leh

North Korea ram hotu, Kim Jong-un chuan an rama cham mek, Russia foreign minister Sergei Lavrov hnenah Russia-in Ukrain laka hma a lakna zawng zawngah NKorea chuan a thlawp zel dawn tih a sawi niin state media chuan an tarlang.

Sergei Lavrov hi ni thum cham turin NKorea-ah hian a zin a, NKorea ram hruaitute hmuin Wonsan khawpuiah NKorea foreign minister Choe Son Hui nen meeting an nei bawk a ni. Ram pahnihte hian thawhdunna zau zawk siam an remti a ni.

NKorea state media, KCNA chuan an ram hotu lu ber, Kim Jong-un chuan Russia president Vladimir Putin-a'n Ukraine nena an buaina neih mek chingfel tura hma a lakna hrang hrangah thu delhkilh awm loa Russia an thlawp zel tur thu hi a sawi tih a tarlang. Russia leh NKorea inkar boruak hi kum 2022 February thlaa Russia-in Ukraine a run hnuah a ṭha zual nia sawi a ni. Russia pui turin NKorea sipai 10,000 chuang an lo tir tawh bawk. Hei bakah indona avanga Russia-a Kursk bial din thar lehna turah NKorea hian military engineer leh builder 6,000 vel thawn leh a tiam bawk.