China-Nepal ramria tuilian vangin mi 8 an thi

China leh Nepal inrinaah Thawhlehni khan ruahsur nasa avangin tui a lian a, tuilian vang hian mi pariat an thih bakah chin hriat lohin mi 31 an awm tih official-te chuan an sawi.

Tuilian hian China leh Nepal inkalpawhna lei, Bhotekoshi lui chunga dawh Friendship Bridge a len chhe bawk. He lei hi Nepal khawpui, Kathmandu aṭanga km 120 vela hlaa awm a ni. Ramria custom officer-te enfiah tura bungrua dahte chu tuilian hian a la tel a ni. Tuilianin a lak zingah hian electric vehicle 40-50, apple dahna bawm lian 17, pheikhawk leh electronic bungrua dahna bawm 22-25 te an tel.

Nepal police-te chuan tuilian tuarte chhanchhuah leh, chin hriat loha awm te zawn hna hi ngawrh taka an thawh mek thu an sawi. Mi 55 chhanchhuah an ni tawh a, an zingah hian India mi pali leh China mi pakhat a tel.

Nepal prime minister Khadga Prasad Oli chuan chhiatna thlenna hmun hi a pan nghal a, minister leh official eng emaw zatin an ṭawiawm. Oli chuan Thawhlehni zan khan emergency meeting a ko a, security force leh sorkar office-te chu chhanchhuah hna thawhnaah an theih anga pui turin a chah.