France chhim lamah ram a kang

France ram chhim lam, an ram khawpui lian pahnihna Marseille bulah ram nasa takin a kang a, kangmei chhuak vang hian Spain nena an in kalpawhna kawngpui khar lailawk a ni. Thawhlehni khan Marseille airport pawh khar a ni bawk.

Ram kang ṭhelh hna hi kangṭhelhtu 1,000 chuangin an thawk mek a, mahse an la thunun thei lo. Kang an ṭhelhnaah kangṭhelhtu pakuain hliam an tuar a ni.

Marseille hmar lam, Pennes-Mirabeau bulah Thawhlehni zing lam khan ram hi a kang ṭan a, hei hi kawngpuia car pakhat kangin a mankai niin an sawi. Khua a ro vang leh thli na tak a tleh tel avangin a kangkai chak hle. Mi 400 vel chu an chenna in aṭanga sawn chhuah an ni tawh. Meikhu a nasat avangin mipuite chu pawn chhuak lo tura ngen an ni bawk.

Interior minister Bruno Retaileau chuan kangmei chhuak hian chenna in 10 a kang chhe tawh a, in dang 60 pawh an him tawh lo niin a sawi.

Europe ram hmun dangah pawh ram kang a thleng nual bawk. Spain hmarchhak, Catalonia biala Tarragona province-ah ram hectare 3,000 dawn a kang a, Spain ram chhung hmun dangah pawh ram kang hi a awm bawk. Greece ramah pawh hmun 41-ah ram a kang a, heng zinga hmun 34 chu ṭhelh mih an ni tawh thung.