Nausen leh naupang tana malaria damdawi pawm

Nausen leh naupang kum nga hnuai lam tana hman bik tur, malaria damdawi chu pawm a ni ta a, Africa ramah pek chhuah hmasak a ni ang.

Kum 2023 khan khawvel pumah malaria natna kaihhnawiha thi hi mi 597,000 an awm. Malaria vanga thi zinga a tam ber hi Africa ramah niin, thi zinga hmun lia ṭhena hmun thum hi kum nga hnuai lam an ni.

Naupang malaria veite enkawlna tur damdawi hi awm mah se kum nga hnuai lam leh nausen bik hman tur erawh a hranin a la awm lo. Hei vang hian kum nga chunglam puala hman tura tihte hi hman ve mai ṭhin a ni a, mahse hei hi an tan a him loin, overdose pawh a hlauhawm thei hle.

Nausen leh naupang kum nga hnuai lam malaria damdawi pawm tak hi drug company Novartis siam a ni a, Switzerland-a not-for-profit organisation, Medicines for Malaria Venture (MMV) nen thawkduna an siam a ni. He damdawi hi Coartem Baby or Riamet Baby tia hriat a ni. He damdawi hi malaria tamna, Africa-a ram pariatah trial neih a lo ni tawh a, pawm a nih tak avangin heng ramah hian an pe chhuak hmasa dawn a ni.