Texas-ah tuilian vanga thi 100 an chuang tawh

US-a Texas state-ah kar kalta Zirtawpnia tuilianin chhiatna a thlena thi chu nimin thleng khan mi 100 an chuang tawh a, chin hriat lohin mi eng emaw zat an awm bawk.

Ruah a la sur chhunzawm zel avangin chhanchhuah hna an thawk chak thei lo a, chin hrait loha awmte dama hmuh beiseina pawh a tlem tawh hle. Hmeichhe naupang puala Kristian summer camp buatsaih, Camp Mystic chuan an camp-a tel mi 27 chu thi zingah an tel tih an sawi a, hetih lai hian hmeichhe naupang 10 leh camp counsellor pakhat chu an chin hriat a ni lo.

Tuilianin chhiatna a thlena thi zinga 84 hi Kerr County ami an ni. Zirtawpnia ruahsur nasa avanga Guadalupe River lian chuan chhiatna nasa tak a thlen a ni. Thi zinga puitling 22 leh naupang 10 te chu tunge an ni tih finfiah an la ni lo tih Sheriff office chuan a tarlang.

President Donald Trump sawiseltute chuan chhiatna thlen chhan hi khaw chin hrilh lawktu, National Weather Service (NWS) agency, National Oceanic and Atmospheric Administration a thawktu tam tak ban an nih vang niin an puh. Mahse White House press secretary, Karoline Leavitt chuan he thil thlengah hian President puh chi a ni lo tih sawiin, tuilian thleng hi thuneitute thiam loh a ni lo, tiin NWS pawhin a hmain warning an ti chhuak tih a sawi.