Greece-a ram kang vangin mi 1,500 sawn chhuak

Greece rama thliarkar lian ber leh mipui bitna ber, Crete island-ah Nilaini aṭang khan ram a kang a, mi 1,500 chuang chu hmun him lamah sawn chhuah an ni tawh.

Thliarkar chhim chhak lam, Ierapetra khuaah Nilaini zan khan ram hi a kang ṭan a, khaw lum leh ro bakah thli a tleh tel bawk avangin a kang kai chak hle. Kang ṭhelh tur hian Athensaw khawpui aṭangin kangṭhelhtu 230 vel tirh an ni tawh bawk.

Ierapetra khuaa ram kang hian khaw chhunga chenna in leh hotel te pawh a kang kai tel tawh niin tualchhung thuneitute chuan an sawi. Mi tam tak hmun him lamah sawn chhuah an ni a, meikhu nasa avangin ṭhenkhat chuan thawk lama harsatna neiin health centre-ahte kalpui an ni bawk.

Vice-Prefect Yannis Androulakis chuan Ningani zan thleng khan hmun pathumah ram kang hi a la nasa hle tih a sawi a, thli chak tak tleh nen a darh chak hle a ni, a ti. Water bomber thlawhtheihna hmangin ram kang hi ṭhelh ni mah se, a kan nasatna hmunte erawh an thleng thei rih lo tih a sawi.

Greece ram hian nipui khaw lum zual laiin ram kang hi a tuar fo a, nikum pawh khan ram hectare 45,000 vela zau chu a kang a ni. Kum 2023 khan ram hectare 175,000 dawna zau a lo kang tawh bawk a, hemi ṭum hian an ram khaw lum lam hi 46 degree Celsius a tling.