Bangladesh PM hlui Hasina thla 6 tang turin hrem

Bangladesh-a International Crimes Tribunal (ICT)-a member pathum awmna bench chuan an ram prime minister aṭanga paihthlak tak, Sheikh Hasina chu court thupek a zah loh avangin thla thum lung-in tang turin a hrem.

Sheikh Hasina hi a kaihhruai sorkar policy duh lohna lantira zirlaite kaihhruaia nawrh huaihawtna kal zelah, kum 2024 August thla khan prime minister a nihna aṭangin paihthlak a ni. India ramah tlanchhe nghalin tun thlengin a la awm zui a ni. Hasina hi paihthlak a nih hnuah thubuai hrang hrang siam sak ni tawh mah se, tun ṭum hi a thubuai neiha hrem a nihna hmasa ber a ni thung.

ICT-ah complaint thehluhah, Hasina hian nawrh huaihawt laia police-te beih letna avanga thi, mi 227 te that turin phalna a nei a ni tih a sawi niin an tarlang. A thubuai ngaihtuahna tura Tribunal hmaa inlan turin vawi tam tak koh ni mah se a inlan duh lo. Hei vang hian Nilaini khan TCT bench chuan court thupek zawm lo leh zah lohah puhin, hremna hi a ti chhuak ta a ni.

ICT hi kum 2008-a Hasina in a din a ni nghe nghe a, 1971 Liberation War-a dan pela chete chungthu ngaihtuahna tura a tih a ni. Mahse PM aṭanga paihthlak a nih a, ram danga himna zawnga a tlanchhiat hnuah sorkar lailawk, chief adviser Mohammed Yunus kaihhruai chuan Tribunal-ah hian judge leh prosecutor tharte a ruat zui ve nghal a ni.