US Army kum 250 tlin lawmna pualin military parade nei

US Army in kum 250 a tlin lawmna pualin Inrinni khan Washington DC-ah kum tam tak chhunga military parade pui ber neih a ni. Kum 34 hnua US military parade neih leh hmasa ber a ni bawk.

Military parade hi president Donald Trump kum 79 pian champha, June 14-ah neih a ni a, he hunah hian sipai 7,000 an tel. 21-gun salute nen Constitution Avenue-a hun hman a ni a, khaw ṭha lo tak hnuaiah parade en tur hi mi sing tel an pungkhawm a ni.

Hetih lai hian US ram chhung hmun hrang hrangah Trump duh lotute chuan parade neih ni hian 'No Kings' protest an huaihawt ve bawk. President atana Trump thlan nawn leh a nih hnua amah duh lotute pungkhawm tamna ber nia sawi a ni ve bawk.

Parade-ah hian sipai ṭhahnem tak bakah Army tank 128 an tel a ni. US Air Force fighter jet-te thlawh tir tum erawh khuain a zir loh avangin an ti tel ta lo. President Trump hian a term hmasaah pawh khan military parade pui tham tak hi buatsaih a lo tum tawh a, a ti hlawhtling hman ta lo a, kuminah US Army kum 250 tlin pualin an ti puitling thei ta a ni. "Ram dang pawhin an hnehna lawmna an buatsaih ṭhin a, America pawhin hei hi a tih ve a hun tawh a ni," tiin parade tawpa thu a sawinaah a sawilang a, America chu a hma aia ropui leh chak zawk a ni dawn tih a sawi bawk. An sipaite chu fakin, US sipaite chuan an bei a, hnehna an chang ṭhin tiin a sawi.

US-in military parade a neih hnuhnung ber chu kum 1991-a President George HW Bush hunlaia a neih kha a ni. He military parade hi Gulf War tawpna leh, hnehna an chan lawmna puala buatsaih a ni.