2024-ah nuclear ralthuam siamna atana sum sen 11% in a pung

International Campaign to Abolish Nuclear Weapons (ICAN) in nimin, June 13, 2025-a report a tih chhuahah, kum 2024 khan nuclear ralthuam nei ram pakuaten nuclear ralthuam siamna atana an sum sen chu a kum hmasa aiin 11% in a pung tih a tarlang.

Kum 2024 chhungin nuclear ralthuam atana sum sen punna hi USD tld 10 niin, a pumpuia sum an senral USD tld 100.2 a tling niin nuclear ralthuam tih bo a ni theihna atana hma la tu, civil society intelkhawmin an din ICAN chuan a sawi.

US chu kum 2024-a nuclear ralthuam tana sum seng tam ber niin USD tld 56.8 chuang a seng a, nikum bika a sum hman punna hi USD tld 5.3 a tling. China chuan USD tld 12.5 sengin, Britain hi USD tld 10.4 a seng bawk. Anni bakah nuclear ralthuam nei dang ramte hi France, India, Israel, North Korea, Pakistan leh Russia te an ni. Kum nga liam ta chhungin nuclear ralthuam nei ramten an sum sen hi 32% in a pung tawh a ni.

ICAN report chuan nuclear weapon contract awm mek hi USD tld 463 hu vel a ni tih sawiin, heng contract-te hi kum tam tak daih an ni, a ti. Kum 2024-ah nuclear weapon contract thar hi USD tld 20 hu vel siam a ni bawk.

Hetih lai hian nuclear ralthuam tih bona tura hmalakna hi ram tam takin an thlawp thung. UN Nuclear Ban treaty chu ram 98 in an thlawp tawh a, thlawptu pawh an la awm belh zel an beisei tih ICAN chuan a sawi a ni.