Bangladesh hruaitu Yunus-a'n inthlan zawhah ban a tum

Bangladesh sorkar lailawka hruaitu, chief adviser Muhammad Yunus chuan ram hruaitu dinhmun chelh chhunzawm zel a tum lo tih sawiin, an ram inthlanpui neih zawhah a ban tur thu a sawi.

Kum 15 zet Bangladesh-a ro lo rel tawh, prime minister hlui Sheikh Hasina leh a kaihhruai sorkar chu nikum August thla khan zirlaite kaihhruai nawrh huaihawt hmangin paihthlak a ni. Hemi hnu hian Nobel Prize pawh lo dang tawh, Yunus hi an ram hruaitu lailawk ni tur hian ruat a ni zui ta a ni.

Yunus chuan an ram siamṭhatna turin a kaihhruai sorkar lailawk chuan hun a la mamawh tih sawi mah se, political party hrang hrangten inthlanpui buatsaih thuai tura an nawr hnuah tun thla tir lam khan April, 2026 ah inthlanpui buatsaih a nih tur thu hi a puang ta a ni. Inthlanpui neih hunah, mipuiten an aiawh tur an thlan chhuah sorkar hnenah thuneihna hlan chhawn chu an tih tur a ni tih sawiin, mipui thlan sorkar kuta thuneihna an hlan hunah mipuite pawh an hlim ngei a beisei thu a sawi. Hei vang hian inthlan pawh felfai taka kalpui a ngai tih sawiin,'Inthlan a felfai loh chuan kan buaina hi kan chingfel thei tawh ngai lo ang," a ti.