Colombia President candidate tur Miguel Uribe kap hliam

Colombia Senator, nakkuma an ram President thlanna neih tura candidate ni tura rin, Miguel Uribe Turbay chu Inrinni khan Bogota-a campaign rally a neihnaah silaia kah hliam a ni.

Uribe-a party, conservative Democratic Center party chuan he inbeihna hi Fontibon venga thleng a nih thu sawiin, Uribe hi a hnung lam aṭanga vawi thum kah a ni, an ti. A lu ah vawi hnih kah niin, a khupah vawi khat kah a ni bawk. A dinhmun hi puanzar a ni lo. Silai hmetpuaktu nia rinhlelh pawh hi man a ni tawh a, he pawikhawihna thlenga inhnamhnawih dangte pawh zawn mek an la ni bawk.

Colombia president Gustavo Petro chuan Uribe kah a ni chu a dem thu sawiin, nunna chu zah tur a ni tiin, France rama zin a tum pawh a ṭhulh phah. Defence minister Pedro Sanchez pawhin sipai leh police bakah intelligence agency-te chu pawikhawihtu man chhuak tura thupek a pek tawh thu a sawi.

Colombia ram president thlanna hi nakkum May 31 hian neih a ni dawn a, kum 39 mi Uribe Turbay hian March thla khan inthlanah hian chuh a tum thu a lo sawi tawh a ni.