Gaza Strip indona tih tawp phutin Rome-ah kawng zawh

Italy khawpui, Rome-ah Inrinni liam ta khan eptu party-te huaihawtin Gaza Strip-a indona thleng mek tih tawp phutin mi tam tak in kawng an zawh. Italy-a right-wing sorkar chu Gaza-a thil thleng chungchanga thawm nei lo lutukah an puh bawk.

Kawngzawhte hian insuatna thleng an duh loh thu leh, Palestinian te zalenna an duh thu ziakte an keng a, Palestinian flag leh political party flag hrang hrang an keng bawk. A huaihawttute chuan kawng zawh hi mi nuai thum vel an tling niin an sawi.

Prime minister Giorgia Meloni kaihhruai sorkar chu Gaza Strip-a Israel chetdan chungchangah Israel prime minister Benjamin Netanyahu demna thu sawi turin eptu lam chuan an nawr. Kar tir lam khan PM Meloni hian Israel chu Gaza-a a sipaite beihpui thlakna ti tawp tur leh, civil mite himna ngaihtuah turin a lo ti tawh a ni. Mahse eptu lam chuan a sawisel dan hi a nep lutuk niin an ngai.