Trump-a'n LA-a buaina chhuak vangin National Guard tir

US-a California state-a Los Angeles khawpuia thuneituten document nei loa an rama pem lutte dap chhuah hna an thawh mek duh lohna lantira buaina a chhuah avangin, president Donald Trump chuan venhim hna thawk turin National Guard 2,000 a tir.

Inrinni khan Immigration and Customs Enforcement (ICE) agent-ten document nei lote dap hna an thawhnaah, Latino Paramount district-ah mi tam tak pungkhawmin an lo dang a ni. Pungkhawmte hnawh darh nan hian tear gas-te hman a ni. ICE in dan loa pem lutte dap chhuah hna an thawhnaah hian kar liam ta chhung khan LA-ah hian mi 118 an man tawh a ni.

Hetih lai hian California democratic governor, Gavin Newsom chuan ICE beihpui tlak hna thawh chu a sawisel a, buaina a punlun phah dawn zawk niin a sawi. Mahse President Trump chuan Truth Social platform lamah Governor Newsom hi a sawisel zui a, thawhpui tlak loh niin a puh.

Buaina chhuaka National Guard duty tir tur hian state governor-ten an ko lut tlangpui ṭhin a, mahse Newscom hian a koh luh duh loh avangin President Trump hian a thuneihna hmangin a tir ta nia sawi a ni. Trump chuan Governor Newscom leh LA mayor Karen Bass ten an tih tur an ti duh lo a nih chuan, sorkar laipui chu inrawlhin buaina chinfel dan a ngaihtuah mai dawn tiin a lo sawi tawh a ni.

Defence secretary Pete Hegseth chuan buaina a punlun zel a nih chuan marine tirh luhah avau bawk a, Camp Pendleton-a awmte pawh inring tura hriattir lawk tawh an ni, a ti.

Los Angeles-a nawrh huaihawtnaa tharum thawhna a thlen hnuah, President Trump chuan nawrh huaihawtna hmunah face mask hman khap a ni tawh dawn tih nimin khan a sawi.