Kum 30 chhunga Hajj chhimtu tlem ber kum thleng

Saudi Arabia-a Muslim khawpui thianghlim, Mecca-a Islam sakhaw hun pawimawh, Hajj hmang tura kal chu Covid-19 len kum chhiar tel lohin, kum 30 chhung an tlem ber kum a ni.

Hajj Ministry-in Ningania report a tih chhuahah, Hajj hmanga kal in ziak lut hi mi 1,673,230 a ni a, a tam zawk hi Saudi Arabia ram pawn lam aṭanga kal an ni. Kumina kal an tlem chhan hi thuneitu lam chuan an la sawifiah lo. Nikum aiin nuai 1.6 dawnin an tlem zawk a ni. Hajj hmangtu tam ber ṭum chu kum 2012 kha niin, khawvel ram hrang hranga Muslim mi mtd 3.16 chuang an kalkhawm.

Kum 2020-2022 inkar khan Covid-19 hri leng vangin he hun hmanga kal turte hi bithliah chin siam a ni a, kum 2023 aṭang khan khuahkhirhna siamte hlih a ni leh ṭan a ni. Hetih lai ram hrang hrangte sum dinhmun tlahniam leh, thil man sang zelte avangin mi tam tak tan Hajj hmang tura kal chu a harsa ve zel a, hei bakah Saudi Arabia khaw lum lutuk leh, sorkarin dan khauh tak a siam chu biakina kal tum tam tak an tlem phah chhan nia ngaih a ni bawk.