Pakistan tan-in aṭang tang 100 chuang tlan chhuak

Pakistan chhim lam, Sindh province khawpui Karachi khawpuiah nimin zing khan lirnghing vangin tan-ina tangte chu an cell aṭangin chhuahtir an ni a, hemi hnu hian tangte hian security guard-te bei zuiin an zinga mi 200 chuang chu an tlan chhuak. An inbeihnaah security guard zinga pathumin hliam an tuar a, silai an hmehpuahah tang pakhat a thi bawk.

Police official Kashif Abbhasi chuan khawvar hma deuha tan-in aṭanga tlan chhuakte hi mi 219 an ni a, an zinga 79 chu man leh nghal an ni tih a sawi. Tlan chhuak zingah hian firfiak thiam loh chantir emaw, an thubuai ngaihtuah lai mek te an tel lo niin a sawi. Man loh la awmte zawn hna thawh mek a ni tih thu a tarlang.

Karachi-ah hian Thawhṭanni zan leh nimin zing thleng khan lirnghing na vak lo ṭum eng emaw zat a thleng a, hei vang hian venthawn thilah jail-a tangte chu an cell aṭanga chhuah tirin main gate bulah an awm tir a ni. Karachi jail-ah hian mi 7,00 - 1,000 inkar vel an tang nia sawi a ni.